ADSA – Azərbaycan Daun Sindromu Ailəsi İctimai Birliyinin saytına xoş gəldiniz.
Bütün dünyada olduğu kimi Azərbaycanda da Daun Sindromu daşıyıcısı olan yüzlərcə uşaq, gənc və yaşlı nəsildən olan insan var. Həm onlar, həm də onların valideyinləri bir çox problemlərlə qarşılaşırlar, bu problemlər əsasən Daun Sindromu haqqında onları tərbiyə edən insanlarda lazımi biliklərin olmamasından qaynaqlanmaqdadır. ADSA İctimai Birliyi ilk növbədə bu bilik defisitini aradan qaldırmağı qarşısına məqsəd qoymuşdur.
Adsa.az saytı da bu məqsədə xidmət edəcəkdir. Yeni müstəqillik qazanmış respublikamızda xüsusi qayğıya ehtiyacı olan insanların, o cümlədən Daun Sindromu daşıyıcılarının sosial müdafiəsi, təhsili və sağlamlığı ilə bağlı bir çox qanunvericilik aktları qəbul edilib, Azərbaycan Konstitusiyasında onların təməl haqları öz əksini tapıb. Lakin, Daunlu uşaqların valideyinlərinin birgə hərəkatına da böyük ehtiyac vardır. Valideyin dətək qruplarının yaradılması, bilik və təcrübənin paylaşılması, problemlərin birlikdə əl-ələ verərək aradan qaldırılması son dərəcə vacibdir. Unutmayın, dolğun həyat yaşamaq bizim övladlarımızın haqqıdır.
Bu sahədə inkişaf etmiş mədəni dünya ölkələrinin zəngin təcrübəsi bizim ixtiyarımızdadır. Daun Sindromu haqqında qədimlərdə yayğın olan xürafat bu ölkələrdə əsasən dağılmışdır, bizim öhdəmizə düşən sadəcə olaraq bu təcrübəni öyrənib yaymaqdan ibarətdir.
ADSA – Azərbaycan Daun Sindromu Ailəsi 2010-cu ilin may ayında, Azərbaycanda Daun Sindromlu insanların problemlərinin həll olunması, valideynlər arasında həmrəyliyin yaradılması məqsədilə qurulmuşdur.
Təşkilatın rəhbəri Fəridə Hüseynova DS uşaq anasıdır. Avropa Daun Sindromu Ailəsinin üzvüdür. DS uşağın təlim və tərbiyəsi sahəsində təcrübəyə malikdir.
Biz Daun Sindromunu əlillik kimi görmürük, bunu həyatın fərqli bir üzü kimi qəbul edirik. Daun Sindromlu şəxslərin konstitusiya hüquqlarına sahib olan vətəndaşlar olaraq cəmiyyətdə öz yerlərini tutmalarından ötrü valideyinlərlə əl-ələ verərək bəzi işlər görmək istəyirik.